Ceceit, dōrgiņkō! Dzē, kū saceišu! Vīnu reitu eimu pa tū skveru, kas pi Mōras pīminekļa, kur pravoslavnūs bazneica, iz Vēstim Zosi apraudzeit. Putineni čivinej, vējeņš lapeņas škurynoj, vēļ nanūpļautū zōleiti purynoj... Radzu pi vīna rasna kūka šiļte dalykta. Nūsaprīcōju: laikam par kūkim sōkuse dūme dūmōt, byus uzrakstejuse, cik vacs tys miļzeņs, kas, kod i kam par gūdu jū te statejis.
Podeimu pa paneli klōtyn... Tēmeju i ar okulerim, i bez okuleru navaru saburtōt! A da tō kūka sūli trejs četri pa zōleiti jōbrīn. Dabrydu. Šiļts kai tova paplāte! Myužeigs skaistums! Ņā, Ņā, bez noglu! Ar stričeiti dasīts.
A tī raksteits: pa parka zaļū zonu staigōt aizlīgts! Stōvu tamā zōlē kai stobs! Kū niule? Itū raksteitū lykumu asu pōrkōpuse! A ka policeja nūgius? Plitavōju da Zoses naatsavārdama, lai potograpu syuta itū myužeigū skaistumu nūbiļdeit, lai vysi zyna, kai Rāznē zaļū zonu sorgoj!
Ite, Ceceit, pi jyusu, Kalipornejā, ļaudis parkūs vōļojās, a pi myusu, Europas pašelē, vysur zōles bez jāga, pļovas i teirumi, pamasti kutori, kur da vaļas var brodōt, rōpōt, kiuliņōt i vysu kū cytu dareit! Myužeigs skaistums!
Plōciņu Mase 2012. goda 24. majā Rāznē
P.S. A ziņ, dēļ kō itōs zeimes sakōre? Myužeigs skaistums! Dēl europiškim. Lai zyna, ka pi myusu gorodā nav nikaida brodōšona pa zaļū zonu. Puļgeņce stōsteja, ka Europa šūnedeļ myusu gorodu revidēja, miļzeigs bors, goboly symts, Rāzni beja apsādušs kai tī knišli, kas myusu gūtenis otkon beņdej nūst. Pl. M. E. UTĀNA foto
